عايز تبعد كنت صارحنى

خلصت الحدوته

خلصت فى أولها

وحياتى من بعدك

جارى فى تعديلها

لو حلوه أو مره

لازم أكملها....

وقلت هاعيش وياك ف الجنه

وسيبت القلب معاك يتهنى

ليه تكسرنى وتكسر قلبى

ليه ف دقيقه تهد أمالنا؟

جاى بتقولى فوق من اوهامك

جاى بتقولى إحساسك خانك

جاى دلوقت تقوللى " كشفتك"

جاى بتغير كل كلامك!!!

عايز تبعد كنت صارحنى

بينى وبينك

مش تجرحنى

ليه قدام العالم كله

جاى تقوللى كلام يدبحنى؟

كان فيه ألف طريقة تفارق

وافضل احبك وافضل عاشق

وتسيب ذكرى رقيقه ف قلبى

مش تنهينى ف ست دقايق

كنت فاكرنى هاجرح فيك ؟

أو هاتعصب وأقسى عليك؟

اللى يحب لايمكن يقسى

وانا حبيت....

مكدبش عليك

عارف رغم قساوتى....

معاك..

كنت بكون رقيق وملاك

كنت اتحمل وادوس على قلبى

ولا اتحمل اكون لسواك

عارف...عمر ما حد خدعنى

ما هو مش طبعى أأمن يعنى

جيت ولحدك رحت مسلم

علشان تجرح وتضيعنى

مش هنساك ولا هاظلم قلبك

علشان كنت بجد بحبك

بس عشان يبقى ف علمك

انا أخلصت وعمرى ما خونتك

عارف إيه خلانى حزين ؟

إنى عشقت ف غمضة عين.

بعد ما باب الحب قفلته

بعد ما عشت لوحدى سنين

يلا... عموما عيش وارتاح

ميهمكش أعيش فى جراح

سيبلى الحزن بوجعه وناره

وخد من قلبى جميع افراحه